ਝਿੰਜਰ ਦਾ 'ਬੋਲੇਗਾ ਘਨੌਰ,ਬਦਲੇਗਾ ਦੌਰ' ਪੈਦਲ ਮਾਰਚ ਸੰਪੰਨ; ਯੂਥ ਅਕਾਲੀ ਦਲ ਪ੍ਰਧਾਨ ਦਾ ਪ੍ਰਸ਼ਾਸਨ ਕੋਲ ਲੋਕਾਂ ਦੀਆਂ ਸਮੱਸਿਆਵਾਂ ਉਠਾਉਣ ਦਾ ਅਹਿਦ

ਝਿੰਜਰ ਦਾ 'ਬੋਲੇਗਾ ਘਨੌਰ,ਬਦਲੇਗਾ ਦੌਰ' ਪੈਦਲ ਮਾਰਚ ਸੰਪੰਨ; ਯੂਥ ਅਕਾਲੀ ਦਲ ਪ੍ਰਧਾਨ ਦਾ ਪ੍ਰਸ਼ਾਸਨ ਕੋਲ ਲੋਕਾਂ ਦੀਆਂ ਸਮੱਸਿਆਵਾਂ ਉਠਾਉਣ ਦਾ ਅਹਿਦ

ਘਨੌਰ/ਚੰਡੀਗੜ੍ਹ 8 ਜੂਨ ( ਰਣਜੀਤ ਧਾਲੀਵਾਲ ) : ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਅਤੇ ਘਨੌਰ ਹਲਕਾ ਇੰਚਾਰਜ ਸਰਬਜੀਤ ਸਿੰਘ ਝਿੰਜਰ ਦਾ ਇਤਿਹਾਸਕ ਦਸ ਦਿਨਾਂ ਪੈਦਲ ਮਾਰਚ 'ਬੋਲੇਗਾ ਘਨੌਰ, ਬਦਲੇਗਾ ਦੌਰ' ਸੋਮਵਾਰ ਨੂੰ ਪਿੰਡ ਢੱਕਾਨਸੂ ਕਲਾਂ ਵਿਖੇ ਸੰਪੰਨ ਹੋਇਆ, ਜੋ ਘਨੌਰ ਹਲਕੇ ਵਿੱਚੋਂ ਲੰਘੇ ਇੱਕ ਭਾਵੁਕ ਅਤੇ ਸਿਆਸੀ ਤੌਰ 'ਤੇ ਅਹਿਮ ਸਫ਼ਰ ਦੀ ਸਮਾਪਤੀ ਸੀ। ਢੱਕਾਨਸੂ ਕਲਾਂ ਵਿਖੇ ਵੱਡੀ ਇਕੱਤਰਤਾ ਨੂੰ ਸੰਬੋਧਨ ਕਰਦਿਆਂ ਝਿੰਜਰ ਨੇ ਕਿਹਾ ਕਿ 30 ਮਈ ਨੂੰ ਸ਼ੁਰੂ ਹੋਇਆ ਇਹ ਮਾਰਚ 220 ਕਿਲੋਮੀਟਰ ਤੋਂ ਵੱਧ ਦੂਰੀ ਤੈਅ ਕਰਕੇ 100 ਤੋਂ ਵੱਧ ਪਿੰਡਾਂ ਵਿੱਚੋਂ ਲੰਘਿਆ। ਉਹਨਾਂ ਦੱਸਿਆ ਕਿ 180 ਤੋਂ ਵੱਧ ਪਿੰਡਾਂ ਦੀਆਂ ਪੰਚਾਇਤਾਂ ਮਾਰਚ ਵਿੱਚ ਸ਼ਾਮਲ ਹੋਈਆਂ, ਜਿਸ ਨਾਲ ਇਸ ਦੀ ਪਹੁੰਚ ਅਤੇ ਸੁਨੇਹਾ ਹੋਰ ਮਜ਼ਬੂਤ ਹੋਇਆ। ਝਿੰਜਰ ਨੇ ਸਰਕਲ ਪ੍ਰਧਾਨਾਂ, ਸ਼੍ਰੋਮਣੀ ਅਕਾਲੀ ਦਲ ਦੇ ਆਗੂਆਂ, ਯੂਥ ਅਕਾਲੀ ਦਲ ਦੇ ਮੈਂਬਰਾਂ ਅਤੇ ਘਨੌਰ ਦੇ ਲੋਕਾਂ ਦਾ ਮਾਰਚ ਨੂੰ ਸਫ਼ਲ ਬਣਾਉਣ ਲਈ ਤਹਿ ਦਿਲੋਂ ਧੰਨਵਾਦ ਕੀਤਾ।

ਝਿੰਜਰ ਨੇ ਕਿਹਾ ਕਿ ਉਨ੍ਹਾਂ ਦੀ 10 ਦਿਨਾਂ ਪੈਦਲ ਯਾਤਰਾ ਦਾ 1 ਜੂਨ ਤੋਂ 6 ਜੂਨ ਤੱਕ ਦਾ ਪੜਾਅ ਬਹੁਤ ਗਹਿਰੀ ਮਹੱਤਤਾ ਰੱਖਦਾ ਸੀ, ਕਿਉਂਕਿ ਇਹ 1984 ਦੇ ਘੱਲੂਘਾਰੇ (ਆਪ੍ਰੇਸ਼ਨ ਬਲੂ ਸਟਾਰ) ਨਾਲ ਸੰਬੰਧਤ ਸੀ। ਝਿੰਜਰ ਨੇ ਕਿਹਾ ਕਿ ਇਹਨਾਂ ਦਿਨਾਂ ਦੌਰਾਨ, ਮਾਰਚ ਵਿੱਚ ਸ਼ਾਮਲ ਲੋਕਾਂ ਨੇ ਸਿੱਖ ਪੰਥ ਦੀ ਰੱਖਿਆ ਲਈ ਆਪਣੀਆਂ ਜਾਨਾਂ ਕੁਰਬਾਨ ਕਰਨ ਵਾਲੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਤਤਕਾਲੀ ਕਾਂਗਰਸ ਸਰਕਾਰ ਦੀਆਂ ਕਾਰਵਾਈਆਂ ਵਿਰੁੱਧ ਰੋਸ ਵਜੋਂ, ਇਸ ਪੂਰੇ ਸਮੇਂ ਦੌਰਾਨ ਪ੍ਰਦਰਸ਼ਨਕਾਰੀਆਂ ਨੇ ਆਪਣੀਆਂ ਪੱਗਾਂ 'ਤੇ ਕਾਲੀਆਂ ਪੱਟੀਆਂ ਬੰਨ੍ਹੀਆਂ ਹੋਈਆਂ ਸਨ। ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਨੇ ਇਹ ਵੀ ਸਾਂਝਾ ਕੀਤਾ ਕਿ ਘਨੌਰ ਦੇ ਸਫ਼ਰ ਦੌਰਾਨ ਉਹ ਕਈ 'ਧਰਮੀ ਫ਼ੌਜੀਆਂ' ਨੂੰ ਮਿਲੇ, ਉਹ ਸਿੱਖ ਫ਼ੌਜੀ ਜਿਨ੍ਹਾਂ ਨੇ ਜੂਨ 1984 ਵਿੱਚ ਰੋਸ ਵਜੋਂ ਭਾਰਤੀ ਫ਼ੌਜ ਵਿੱਚ ਆਪਣੇ ਅਹੁਦੇ ਛੱਡ ਦਿੱਤੇ ਸਨ ਅਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲ ਕੂਚ ਕੀਤਾ ਸੀ। ਝਿੰਜਰ ਨੇ ਕਿਹਾ ਕਿ ਮਾਰਚ ਦੌਰਾਨ ਹਲਕੇ ਭਰ ਵਿੱਚੋਂ ਲੋਕ ਸਾਹਮਣੇ ਆਏ ਅਤੇ ਆਪਣੀਆਂ ਸਮੱਸਿਆਵਾਂ ਸਾਂਝੀਆਂ ਕੀਤੀਆਂ। "ਟੁੱਟੀਆਂ ਸੜਕਾਂ, ਕੱਚੇ ਮਕਾਨ, ਨਸ਼ੇ ਦੀ ਸਮੱਸਿਆ, ਵਿਗੜਦਾ ਕਾਨੂੰਨ-ਵਿਵਸਥਾ, ਸੀਵਰੇਜ ਸੰਕਟ ਅਤੇ ਪੀਣ ਵਾਲੇ ਪਾਣੀ ਦੀ ਗੰਭੀਰ ਕਿੱਲਤ ਮੁੱਖ ਮਸਲੇ ਸਨ। ਘੱਗਰ ਬੈਲਟ ਦੇ ਵਾਸੀਆਂ ਨੇ 2023 ਦੀਆਂ ਹੜ੍ਹਾਂ ਦੌਰਾਨ ਟੁੱਟੇ ਬੰਨ੍ਹਾਂ ਦੀ ਅਣਦੇਖੀ ਦਾ ਮੁੱਦਾ ਉਠਾਇਆ। ਸਰਕਾਰੀ ਕਰਮਚਾਰੀਆਂ ਅਤੇ ਪੈਨਸ਼ਨਰਾਂ ਨੇ ਮਹਿੰਗਾਈ ਭੱਤੇ ਦੀ ਲੰਬੇ ਸਮੇਂ ਤੋਂ ਰੁਕੀ ਅਦਾਇਗੀ ਦਾ ਮਸਲਾ ਉਭਾਰਿਆ। ਵਾਸੀਆਂ ਨੇ ਵਿਕਾਸ ਗ੍ਰਾਂਟਾਂ ਨਾ ਮਿਲਣ, ਆਟਾ-ਦਾਲ ਅਤੇ ਸ਼ਗਨ ਸਕੀਮ ਦੇ ਲਾਭਾਂ ਤੋਂ ਵਾਂਝੇ ਰੱਖੇ ਜਾਣ ਅਤੇ ਰੋਜ਼ਾਨਾ ਜ਼ਿੰਦਗੀ ਨੂੰ ਪ੍ਰਭਾਵਿਤ ਕਰਦੀਆਂ ਕਈ ਹੋਰ ਪ੍ਰਸ਼ਾਸਨਿਕ ਅਸਫਲਤਾਵਾਂ ਬਾਰੇ ਵੀ ਸ਼ਿਕਾਇਤਾਂ ਕੀਤੀਆਂ," ਝਿੰਜਰ ਨੇ ਕਿਹਾ।

ਝਿੰਜਰ ਨੇ ਦੋਸ਼ ਲਾਇਆ ਕਿ ਮਾਰਚ ਦੌਰਾਨ ਆਪ ਸਰਕਾਰ ਨੇ ਲੋਕਾਂ ਦੀ ਆਵਾਜ਼ ਦਬਾਉਣ ਦੀ ਕੋਸ਼ਿਸ਼ ਕੀਤੀ, ਕਿਉਂਕਿ ਉਹ ਘਨੌਰ ਦੇ ਲੋਕਾਂ ਦੇ ਵੱਡੀ ਗਿਣਤੀ ਵਿੱਚ ਸੜਕਾਂ 'ਤੇ ਆ ਕੇ ਇਨਸਾਫ਼ ਦੀ ਮੰਗ ਕਰਨ ਤੋਂ ਘਬਰਾ ਗਈ ਸੀ। ਇਸ ਸਫ਼ਰ ਦੇ ਭਾਵੁਕ ਪਲਾਂ ਨੂੰ ਯਾਦ ਕਰਦਿਆਂ ਝਿੰਜਰ ਨੇ ਕਿਹਾ ਕਿ ਇਸ ਮਾਰਚ ਨੇ ਉਹਨਾਂ ਨੂੰ ਅੰਦਰੋਂ ਹਲੂਣ ਕੇ ਰੱਖ ਦਿੱਤਾ। "ਮਾਵਾਂ ਸਾਹਮਣੇ ਆਈਆਂ ਅਤੇ ਆਪਣੀਆਂ ਸਮੱਸਿਆਵਾਂ ਸਾਂਝੀਆਂ ਕਰਦਿਆਂ ਰੋਈਆਂ," ਉਹਨਾਂ ਕਿਹਾ, ਅਤੇ ਇਹ ਵੀ ਕਿਹਾ ਕਿ ਉਹਨਾਂ ਪਲਾਂ ਨੇ ਘਨੌਰ ਦੇ ਲੋਕਾਂ ਲਈ ਲੜਨ ਦਾ ਉਹਨਾਂ ਦਾ ਅਜ਼ਮ ਹੋਰ ਪੱਕਾ ਕਰ ਦਿੱਤਾ। ਸਮਾਪਤੀ ਸਮਾਰੋਹ ਵਿੱਚ ਘਨੌਰ ਦੇ ਨੌਜਵਾਨਾਂ ਨੇ ਝਿੰਜਰ ਨੂੰ ਸਨਮਾਨ ਅਤੇ ਪਿਆਰ ਦੇ ਪ੍ਰਤੀਕ ਵਜੋਂ ਟ੍ਰੈਕਟਰ 5911 ਭੇਟ ਕੀਤਾ। ਇਸ ਭਾਵਭਿੰਨੇ ਸੁਆਗਤ ਤੋਂ ਗਦਗਦ ਝਿੰਜਰ ਨੇ ਐਲਾਨ ਕੀਤਾ ਕਿ ਉਹ ਇਸ ਟ੍ਰੈਕਟਰ ਨੂੰ ਨਿੱਜੀ ਵਰਤੋਂ ਲਈ ਨਹੀਂ, ਸਗੋਂ ਘਨੌਰ ਹਲਕੇ ਦੇ ਲੋਕਾਂ ਦੀ ਸੇਵਾ ਅਤੇ ਇਲਾਕੇ ਦੇ ਵਿਕਾਸ ਕਾਰਜਾਂ ਲਈ ਸਮਰਪਿਤ ਕਰਨਗੇ।

ਝਿੰਜਰ ਨੇ ਐਲਾਨ ਕੀਤਾ ਕਿ ਇਸ ਮਾਰਚ ਨੇ ਘਨੌਰ ਵਿੱਚ ਹੀ ਨਹੀਂ, ਸਗੋਂ ਪੂਰੇ ਪੰਜਾਬ ਵਿੱਚ ਇਤਿਹਾਸ ਰਚਿਆ ਹੈ। "ਜਦੋਂ ਕੋਈ ਲੋਕਾਂ ਦੀਆਂ ਸਮੱਸਿਆਵਾਂ ਸੁਣਨ ਲਈ ਤਿਆਰ ਨਹੀਂ ਸੀ, ਉਦੋਂ ਘਨੌਰ ਦੀਆਂ ਸੜਕਾਂ 'ਤੇ ਇੱਕ ਪੈਦਲ ਮਾਰਚ ਨਿਕਲਿਆ ਅਤੇ ਸਰਕਾਰ ਨੂੰ ਜਗਾਇਆ। ਆਉਣ ਵਾਲੀਆਂ ਪੀੜ੍ਹੀਆਂ ਇਸ ਮਾਰਚ ਨੂੰ ਦਹਾਕਿਆਂ ਤੱਕ ਯਾਦ ਕਰਦੀਆਂ ਰਹਿਣਗੀਆਂ," ਉਹਨਾਂ ਕਿਹਾ। ਉਹਨਾਂ ਨੇ 'ਆਪ' ਸਰਕਾਰ ਨੂੰ ਚੇਤਾਵਨੀ ਦਿੱਤੀ ਕਿ ਘਨੌਰ ਦੇ ਲੋਕ ਹੁਣ ਜਾਗ ਚੁੱਕੇ ਹਨ ਅਤੇ ਇਨਸਾਫ਼ ਲੈਣ ਲਈ ਕੋਈ ਕਸਰ ਨਹੀਂ ਛੱਡਣਗੇ। ਝਿੰਜਰ ਨੇ ਇਕੱਤਰਤਾ ਨੂੰ ਭਰੋਸਾ ਦਿਵਾਇਆ ਕਿ ਉਹ ਮਾਰਚ ਦੌਰਾਨ ਸੁਣੀਆਂ ਸਾਰੀਆਂ ਸ਼ਿਕਾਇਤਾਂ ਪ੍ਰਸ਼ਾਸਨ ਕੋਲ ਉਠਾਉਣਗੇ ਅਤੇ ਘਨੌਰ ਦੇ ਲੋਕਾਂ ਨੂੰ ਇਨਸਾਫ਼ ਦਿਵਾਉਣਾ ਯਕੀਨੀ ਕਰਨਗੇ। ਇਸ ਮੌਕੇ ਜਥੇਦਾਰ ਸੁਰਜੀਤ ਸਿੰਘ ਗੜ੍ਹੀ ਅੰਤ੍ਰਿੰਗ ਕਮੇਟੀ ਮੈਂਬਰ ਐਸਜੀਪੀਸੀ, ਜਥੇਦਾਰ ਜਸਮੇਰ ਸਿੰਘ ਲਾਛੜੂ ਮੈਂਬਰ ਐਸਜੀਪੀਸੀ, ਜਗਮੀਤ ਸਿੰਘ ਹਰਿਆਊ ਜ਼ਿਲ੍ਹਾ ਪ੍ਰਧਾਨ, ਜਥੇਦਾਰ ਲਾਲ ਸਿੰਘ ਸੀਨੀਅਰ ਆਗੂ, ਰਣਜੀਤ ਸਿੰਘ ਰਾਣਾ ਸੀਨੀਅਰ ਆਗੂ, ਸਾਧੂ ਸਿੰਘ ਆਗੂ ਅਤੇ ਹੋਰ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਸਨ।