ਨੈਟਫਲਿਕਸ ਦੀ ‘ਗਲੋਰੀ’ ਦਾ ਧਮਾਕੇਦਾਰ ਟ੍ਰੇਲਰ ਚੰਡੀਗੜ੍ਹ ‘ਚ ਲਾਂਚ, ਕਾਸਟ ਨੇ ਭਰਿਆ ਜੋਸ਼ ਤੇ ਉਤਸ਼ਾਹ

ਨੈਟਫਲਿਕਸ ਦੀ ‘ਗਲੋਰੀ’ ਦਾ ਧਮਾਕੇਦਾਰ ਟ੍ਰੇਲਰ ਚੰਡੀਗੜ੍ਹ ‘ਚ ਲਾਂਚ, ਕਾਸਟ ਨੇ ਭਰਿਆ ਜੋਸ਼ ਤੇ ਉਤਸ਼ਾਹ

ਚੰਡੀਗੜ੍ਹ 27 ਅਪ੍ਰੈਲ ( ਰਣਜੀਤ ਧਾਲੀਵਾਲ ) : ਨੈਟਫਲਿਕਸ ਦੀ ਆਉਣ ਵਾਲੀ ਸੀਰੀਜ਼ ‘ਗਲੋਰੀ’ ਦੀ ਸਟਾਰ ਕਾਸਟ ਸੁਵਿੰਦਰ ਵਿੱਕੀ, ਦਿਵੇਂਦੂ ਅਤੇ ਪੁਲਕਿਤ ਸਮਰਾਟ ਚੰਡੀਗੜ੍ਹ ਪਹੁੰਚੀ, ਜਿੱਥੇ ਉਨ੍ਹਾਂ ਨੇ ਇਸਦਾ ਧਮਾਕੇਦਾਰ ਟ੍ਰੇਲਰ ਰਿਲੀਜ਼ ਕੀਤਾ ਅਤੇ ਸਮਾਗਮ ਦਾ ਮਾਹੌਲ ਜੋਸ਼ ਅਤੇ ਉਤਸ਼ਾਹ ਨਾਲ ਭਰ ਦਿੱਤਾ। ਇਹ ਸੀਰੀਜ਼ ਹਰਿਆਣਾ ਦੇ ਦੋ ਭਰਾਵਾਂ ਦੀ ਕਹਾਣੀ ‘ਤੇ ਆਧਾਰਿਤ ਹੈ, ਜੋ ਬਦਲੇ ਦੀ ਅੱਗ ਤੋਂ ਦੂਰ ਰਹਿਣਾ ਚਾਹੁੰਦੇ ਹੋਏ ਵੀ ਵਾਪਸ ਆਪਣੇ ਘਰ ਖਿੱਚੇ ਜਾਂਦੇ ਹਨ। ਉੱਥੇ ਬਾਕਸਿੰਗ ਰਿੰਗ ਦੇ ਅੰਦਰ ਅਤੇ ਬਾਹਰ ਉਹ ਅਜਿਹੇ ਸੰਘਰਸ਼ ਵਿੱਚ ਫਸ ਜਾਂਦੇ ਹਨ, ਜਿੱਥੇ ਭਰੋਸੇ ਦਾ ਸਾਹਮਣਾ ਰਾਜ਼ਾਂ ਨਾਲ ਹੁੰਦਾ ਹੈ।

ਸੀਰੀਜ਼ ਦੇ ਕ੍ਰੀਏਟਰ ਅਤੇ ਡਾਇਰੈਕਟਰ ਕਰਨ ਅੰਸ਼ੁਮਨ ਵੀ ਇਸ ਮੌਕੇ ‘ਤੇ ਮੌਜੂਦ ਰਹੇ। ‘ਗਲੋਰੀ’ ਬਦਲੇ ਅਤੇ ਮਹੱਤਵਾਕਾਂਖਾ ਦੀ ਇੱਕ ਦਮਦਾਰ ਕਹਾਣੀ ਹੈ, ਜੋ ਇੱਕ ਕਤਲ ਦੇ ਇਰਦ-ਗਿਰਦ ਘੁੰਮਦੀ ਹੈ। ਇਸਦੀ ਕਹਾਣੀ ਭਾਰਤ ਦੇ ਬਾਕਸਿੰਗ ਸੰਸਾਰ ‘ਤੇ ਆਧਾਰਿਤ ਹੈ, ਜਿੱਥੇ ਰਿੰਗ ਸਿਰਫ ਖੇਡ ਨਹੀਂ, ਸਗੋਂ ਜਜ਼ਬਾਤੀ ਹਿਸਾਬ ਬਰਾਬਰ ਕਰਨ ਦੀ ਜਗ੍ਹਾ ਬਣ ਜਾਂਦੀ ਹੈ।

ਕਹਾਣੀ ਇੱਕ ਟੁੱਟੇ ਹੋਏ ਪਰਿਵਾਰ ‘ਤੇ ਕੇਂਦ੍ਰਿਤ ਹੈ, ਜਿਸਨੂੰ ਹਾਲਾਤ ਮੁੜ ਇਕੱਠੇ ਹੋਣ ‘ਤੇ ਮਜਬੂਰ ਕਰਦੇ ਹਨ। ਰਘੁਬੀਰ ਸਿੰਘ (ਸੁਵਿੰਦਰ ਵਿੱਕੀ) ਇੱਕ ਸਖ਼ਤ ਬਾਕਸਿੰਗ ਕੋਚ ਹੈ, ਜੋ ਓਲੰਪਿਕ ਮੈਡਲ ਦੇ ਸੁਪਨੇ ਨਾਲ ਆਪਣੀ ਵਿਰਾਸਤ ਨੂੰ ਬਚਾਉਣ ਲਈ ਜੁਝ ਰਿਹਾ ਹੈ। ਉਸਦੇ ਪੁੱਤਰ ਦੇਵ (ਦਿਵੇਂਦੂ) ਅਤੇ ਰਵੀ (ਪੁਲਕਿਤ ਸਮਰਾਟ) ਆਪਣੀ ਭੈਣ ‘ਤੇ ਹੋਏ ਹਮਲੇ ਅਤੇ ਇੱਕ ਉਭਰਦੇ ਬਾਕਸਰ ਦੀ ਹੱਤਿਆ ਦੇ ਪਿੱਛੇ ਦੀ ਸੱਚਾਈ ਖੋਜਣ ਲਈ ਵਾਪਸ ਆਪਣੇ ਸ਼ਹਿਰ ਲੌਟਦੇ ਹਨ।

ਸੁਵਿੰਦਰ ਵਿੱਕੀ ਨੇ ਕਿਹਾ ਕਿ ਰਘੁਬੀਰ ਸਿੰਘ ਸਿਰਫ ਕੋਚ ਨਹੀਂ, ਸਗੋਂ ਅਨੁਸ਼ਾਸਨ ਦੀ ਮੂਰਤ ਹੈ। ਉਸਦੀ ਖਾਮੋਸ਼ੀ ਵਿੱਚ ਹੀ ਉਸਦੀ ਤਾਕਤ ਅਤੇ ਅਧਿਕਾਰ ਦਿਖਾਈ ਦਿੰਦਾ ਹੈ। ਦਿਵੇਂਦੂ ਨੇ ਆਪਣੇ ਕਿਰਦਾਰ ਬਾਰੇ ਕਿਹਾ ਕਿ ਦੇਵ ਇੱਕ ਜਟਿਲ ਅਤੇ ਭਾਵਨਾਤਮਕ ਤੌਰ ‘ਤੇ ਗਹਿਰਾ ਕਿਰਦਾਰ ਹੈ, ਜੋ ਗੁੱਸੇ ਅਤੇ ਦਰਦ ਨਾਲ ਚਲਦਾ ਹੈ, ਪਰ ਫਿਰ ਵੀ ਆਪਣੀ ਜ਼ਮੀਨ ਨਾਲ ਜੁੜਿਆ ਰਹਿੰਦਾ ਹੈ।

ਪੁਲਕਿਤ ਸਮਰਾਟ ਨੇ ਦੱਸਿਆ ਕਿ ਰਵੀ ਇੱਕ ਸ਼ਾਂਤ ਪਰ ਅੰਦਰੋਂ ਜਲਦਾ ਹੋਇਆ ਕਿਰਦਾਰ ਹੈ, ਜਿਸਦੀ ਅਸਲੀ ਤਾਕਤ ਉਸਦੇ ਸੰਯਮ ਅਤੇ ਸਹਿਨਸ਼ੀਲਤਾ ਵਿੱਚ ਹੈ। ਇਹ ਸੀਰੀਜ਼ ਐਟੌਮਿਕ ਫਿਲਮਜ਼ ਬੈਨਰ ਹੇਠ ਬਣਾਈ ਗਈ ਹੈ, ਜਿਸਦੀ ਕਹਾਣੀ ਕਰਨ ਅੰਸ਼ੁਮਨ, ਕਰਮਣਿਆ ਆਹੁਜਾ ਅਤੇ ਵੈਭਵ ਵਿਸ਼ਾਲ ਨੇ ਲਿਖੀ ਹੈ, ਜਦਕਿ ਇਸਦਾ ਨਿਰਦੇਸ਼ਨ ਕਰਨ ਅੰਸ਼ੁਮਨ ਅਤੇ ਕਨਿਸ਼ਕ ਵਰਮਾ ਨੇ ਕੀਤਾ ਹੈ। ‘ਗਲੋਰੀ’ ਦਾ ਪ੍ਰੀਮੀਅਰ 1 ਮਈ ਨੂੰ Netflix ‘ਤੇ ਹੋਵੇਗਾ।